Vinstri græn enn á siglingu

 

Á stöð 2 var í kvöld birt ný skoðanakönnun á fylgi flokkanna í Suðvesturkjördæmi. Sem fyrr er VG í sókn og eykur fylgi sitt verulega. Það er sem fyrr með Framsóknarmenn að þar hallar undan fæti og Siv Friðleifsdóttir, umhverfisráðherra, ekki á þingi skv. þessari könnun. 

Vinstri græn ná inn tveim mönnum, þeim Ögmundi og Guðfríði Lilju frábært fólk. Íslandshreyfingin og Baráttusamtökin mælast vart og styður það fyrri skoðun mína ef fólk vill horfa raunsætt á málin.

Sjallarnir því miður með of mikið fylgi að mínu mati en að vísu þeirra sterkasta vígi.

Sjálfstæðisflokkurinn: 43% - (38,4%)
Samfylkingin: 24,5% - (32,8%)
VG: 17,4% - (6,2%)
Framsóknarflokkurinn: 5,9% - (14,9%)
Frjálslyndi flokkurinn: 5,6% - (6,7%)
Íslandshreyfingin: 3,3%
Baráttusamtökin: 0,3%

 

Íslandshreyfingin

Ekki er hægt annað en að taka undir beiðni Hjörleifs Guttormssonar þar sem hann hvetur Íslandshreyfinguna og Ómar Ragnarsson til þess að hætta við framboð. Nýjustu skoðanakannanir sýna að þetta framboð verður þess valdandi að ríkisstjórnin heldur velli. Það er að verða nokkuð ljóst og Ómar er með glýju í augunum ef hann telur að fólk þori ekki að gefa sig upp í skoðanakönnunum en kjósi svo Íslandshreyfinguna þegar inn í kjörklefann er komið.

Af hverju ætti fólk ekki að þora að segja í skoðanakönnun að það kysi hreyfinguna? Enginn veit það þegar upp er staðið í öllum þessum könnunum.

Það er líka með ólíkindum að hreyfingar eins og þessi skuli ekki enn vera komin með tilbúna lista þegar tæpur mánuður er til kosninga. Þau Margrét fullyrtu að bjóða ætti allstaðar fram sem og hagsmunahópur eldri borgara og öryrkja en ekkert bólar á landsbyggðarlistum. Þessu var þó lofað um páskana og strax eftir páska.

Nei ég held að fólk eins og Ómar og Margrét ættu að hugsa vel sinn gang og velta því fyrir sér hvort það er virkilega vilji þeirra að ríkisstjórnin falli í vor eða hvort tilhugsunin um hugsanlegt EITT þingsæti sé mikilvægara.

Ómar og Margrét leiða lista Íslandshreyfingarinnar í Reykjavík

Stefnumálin okkar

Hér má finna kosningaáherslur okkar Vinstri grænna og hér er stefnan okkar í heild sinni.  

Má þó til með að segja ykkur frá því sérstaklega að í vikunni kynntu þær Kolbrún Halldórsdóttir, Katrín Jakobsdóttir og Álfheiður Ingadóttir nýtt og viðamikið rit Vinstrihreyfingarinnar - græns framboðs um sjálfbæra þróun - Græn framtíð.

Ritið er alveg frábært og hvet ég ykkur til að skoða það. Eins og flest hjá okkur Vinstri grænum er þetta grasrótarverkefni þar sem fjöldi félaga okkar kom að smíði þess.

Eins og flest annað er ritið um grænu framtíðina þarft framlag til dýpkunar á allri pólitískri umræðu og heildstæðri stefnumótun um umhverfismál á Íslandi.

Stofnun VG í Fjallabyggð

Á fimmtudaginn var stofnfundur VG í Fjallabyggð sem tókst vel. Það þarf ýmsu að breyta með tilkomu sameinaðs sveitarfélags og þetta er eitt af því. Ég held satt að segja að þetta sé fyrsta félagið sem stofnað er í Fjallabyggð.

Á eftir var opinn stjórnmálafundur þar sem Steingrímur Joð ræddi pólitíkina og spjallaði við fundarmenn.

Á morgun mánudag er fundur hjá húsnæðisnefnd þar sem taka á fyrir sameiginlegar reglur hins nýja sveitarfélags - þótt fyrr hefði verið. Mér finnst þetta hafa tekið allt of langan tíma - mál sem ég tel ekki vera ýkja flókið.

Á þriðjudaginn er svo bæjarstjórnarfundur á Sigló - ekki margt sem liggur fyrir fundinum en eftir hann ætlar Sigurður Tómas að ræða um tillögur að framtíðarskipulagi stjórnsýslunnar hér í Fjallabyggð. Það verður spennandi að sjá hvað þar ber helst á góma og hvort mér hugnast það. Nokkuð ljóst að mér finnst að sviðsskiptingin eigi að vera þrjú svið og hafa eigi þrjá sviðsstjóra, fjölskyldu-og menningarmála, fjármála- og stjórnsýslu- og skipulags- og umhverfismála.

En læt vita hvað uppi verður í þeim málum.

Viðurkennd starfsheiti

Datt í hug þegar ég las grein Ástu Óla Halldórsdóttur í morgun þar sem hún fjallar um viðurkenningu á starfsheiti leiðsögumanna og hversu dýrt það er að fara í nám hjá Leiðsögumannaskóla Íslands.

Það er margt skrýtið í kýrhausnum þegar kemur að viðurkenningu á starfsheiti til starfsréttinda, hvað með t.d. leikskólakennara sem hafa barist í mörg ár fyrir lögverndun. Ég er í meistaranámi í náms- og starfsráðgjöf við HÍ - það er ekki lögverndað starfsheiti þrátt fyrir að fyrir liggi þingsályktunartillaga um að breyta því.

Það eru eflaust fleiri stéttir en mann grunar sem svo er fyrir komið - því miður.

 

offun og h-effun

Það er nú hálf broslegt þó ekki sé mér hlátur í hug að sjá þessa hringavitleysu hjá ríkisstjórninni í offun og h-effun í öllu sem þeir mögulega geta.

Eitthvað kostar það nú ríkiskassann þessi endemisvitleysa sem nú á sér stað í yfirmannaráðningum. Ekki það að Páll virðist vera tveggja starfa maki og spurning hvort greitt er samkvæmt því eða um sparnað sé að ræða. Alla vega þarf greinilega að ráða í hans stað þennan hálfa mánuð þar til offunin nær formlegri lögfestu.

Ég tel það þó að betra hefði verið að hafa formið eins og var og tala nú ekki um grunnlínukerfið og dreifingin sem að mínu viti á að vera í eigu ríkisins sem er það eina sem getur jafnað aðgang okkar landsmanna allra - ekki bara á höfuðborgarsvæðinu og Akureyri.

Það er svo langur vegur frá því að við njótum öll sambærilegrar þjónustu þrátt fyrir að við komum til með að borga áfram öll sömu nefskatta sama hvar við búum á landinu.

Setjum ríkisstjórnina í frí og breytum um áherslur. 

Vinstri græn í vor.

 

Páll Magnússon útvarpsstjóri og framkvæmdastjóri Ríkisútvarpsins ohf.

Vinstri græn og fylgisaukning þeirra

Ég má til með að benda á heimasíðu Björns Vals Gíslasonar http://bvg.is sem segir akkúrat það sem ég vildi sagt hafa þegar kemur að umræðu um fylgisaukningu Vinstri grænna.

Það er nefnilega með ólíkindum að geta ekki unnt Vinstri grænum þess að fylgisaukningin sé vegna hreyfingarinnar sjálfrar og stefnufestu heldur sé skýringa ævinlega að leita eingöngu í öðrum flokkum. Kíkið á síðuna Björns Vals.

Annars hef ég verið afspyrnu léleg að skrifa hér á þessa pólitísku síðu og sett frekar inn á http://blog.central.is/bjarkey en þar eru frekar heimilislegar pælingar og finnst mér það ekki passa að vera með það hér.

Reyni að gera betur á næstunni enda fjör að færast í leikinn í pólitíkinni.

Bent á Lágheiði

Þetta hljómar nú hálf skringilega fyrir mér íbúa í Ólafsfirði að sjá bent á veg 82 um Lágheiði vegna viðgerða í Múlagöngum.

Ég veit ekki hvort þið sem þetta lesið áttið ykkur á því að um 40 mínútna akstur er frá Ólafsfirði til Akureyrar um Múlagöng en um 2 og 1/2 klukkutími um Lágheiði.

Ef mig langar að skreppa í bíó, sem ég verð að sækja til Akureyrar, þá er það útilokað mál þar sem göngin loka svo snemma. Eins þyrfti ég að taka mér frí í vinnunni ef ég ætlaði um Lágheiði því það er um 5 klukkutíma akstur fram og til baka + það sem erinda þarf á Akureyri.

Þetta er náttúrulega alveg ótækt og í raun skömm fyrir Vegagerðina hversu lengi "viðgerðir" hafa staðið í Múlagöngum. Fyrir löngu hefði átt að klæða öll göngin og laga malbikið þar sem  það var orðið stórhættulegt og opna Múlaveginn á meðan. Nú er sá vegur hins vegar orðinn svo illa farinn að það er ekki hægt.

Munurinn á lokun í Hvalfjarðargöngum og Múlagöngum er sá að þau fyrri loka yfir blánóttina en hin frá því snemma kvölds - munar öllu.

Múlagöng og Hvalfjarðargöng lokuð að næturlagi

Flokkráðsfundur

Það var mikið fjör á flokkráðsfundi Vinstri grænna um síðustu helgi en þangað flaug ég eftir vinnu og fór beint á stjórnarfund. Í kjölfarið fylgdi svo flokkráðsfundurinn þar sem farið var yfir praktísk mál og eftir kvöldmat voru svo almennar stjórnmálaumræður.

Mjög góð mæting var og fannst mér fundurinn mjög góður, umræður skorinortar - enda Kata fundarstjóri. Mikil þátttaka var í þeim og safnaðist töluvert í sarpinn fyrir laugardaginn en þá voru málefnahópar.

Ég byrjaði í landsfundarundirbúningshópnum með Svandísi sem hópstjóra en endaði í lagahópnum með Kristínu sem hópstjóra og öðru góðu fólki. Að mörgu þarf að hyggja þegar lögum flokks er breytt og nauðsynlegt að sjónarmið bæði stórra og lítilla svæðisfélaga komi þar að. Ég var því fegin að hafa sveiflað mér á milli hópa en það var umræða í landsfundarhópnum sem varð til þess að ég ætlaði að koma ákveðnum atriðum á framfæri en var svo "innlimuð" í lagahópinn.

Undir hádegi var gerð grein fyrir niðurstöðum hópanna þar sem þetta er svona innslag fyrir landsfundinn og flestir hópar verða áfram starfandi fram að þeim tíma við fíniseringar og fleiri góðar hugmyndir eiga eflaust eftir að vakna hjá svo hugmyndaríku fólki eins og Vinstri græn hafa innanborðs.

Eftir hádegi var svo fundur með Drífu framkvæmdastjóra þar sem farið var yfir ný lög um fjármál stjórnmálaflokka með formönnum og gjalkerum svæðisfélaga og kjördæmisráða.

Stemmingin var svo góð á þessum fundum og fullt af nýjum andlitum í bland við þau gömlu. Gott að fá slíkt start í komandi kosningabaráttuna framundan.

 

Við erum....

Það er nefnilega það við erum það sem við skrifum hvort heldur um sjálf okkur eða aðra á netinu. Það vill gjarnan brenna við að ungt fólk lýsir athöfnum sínum á frekar "röffaðan" hátt en áttar sig ekki á því að með því er það að gefa öllum - ekki bara vinunum ákveðna mynda af sér sem einstaklingi.

Þetta framtak AUGA OG SAFT er alveg frábært og auglýsingarnar hitta í mark að mér finnst. Of mikið er um ljót orð á netinu og allir ekki bara ungt fólk þarf að gæta orða sinna þar sem "allir" geta lesið þar sem þar er skrifað.

Ég kenni ungu fólki tölvunotkun og tel mig því vita nokkuð vel að mikið er hægt að bæta eftirlit með "umferð" þeirra á netinu.

Jákvæð og örugg netnotkun í stað eineltis og svívirðinga