Forval Vinstri grænna í Norðausturkjördæmi

Framundan er forval Vinstri hreyfingarinnar græns- framboðs í Norðausturkjördæmi fyrir komandi Alþingiskosningar 2007. Ég hef ákveðið að gefa kost á mér í þessu forvali sem félagsmönnum VG er heimilt að taka þátt í. Mér þykir því við hæfi að kynna mig örlítið og það helsta sem ég hef tekið mér fyrir hendur í pólitík og öðrum störfum.

 Ég hef verið virk í störfum Vinstri grænna nánast frá stofnun, er formaður svæðisfélags VG í Ólafsfirði, formaður kjördæmisráðs VG í Norðausturkjördæmi og sit einnig í stjórn VG. Fyrir sveitarstjórnarkosningarnar s.l. vor sat ég í yfirkjörstjórn VG sem sá m.a. um flesta sameiginlegu þætti kosninganna. Slík kjörstjórn verður einnig starfandi nú fyrir komandi alþingiskosningar og á ég sæti í henni.

Ég hef í tvígang, á því kjörtímabili sem nú er að ljúka, setið á Alþingi sem varamaður Steingríms J. Sigfússonar. Ég lagði m.a. fram þingsályktunartillögu um stuðning við einstæðra foreldra í námi, beitti mér fyrir flutningi verkefna Þjóðskrár út á landsbyggðina, ræddi rekstrarvanda Heilbrigðisstofnunar Austurlands, er meðflutningsmaður nokkurra þingmála t.d. um styrki til foreldra sem ættleiða börn frá útlöndum og um íslenska táknmálið. Auk þess hef ég látið mig varða geðheilbrigðismál barna og ungmenna og stefnu í málefnum barna almennt, lengingu flugbrautarinnar á Akureyri og aðstöðu farþega á Egilsstaðaflugvelli.

Ég tel mikilvægt í komandi kosningum að horfið verði frá þeirri einkavæðingu sem núverandi ríkisstjórn hefur staðið fyrir og hefur aukið á ójöfnuð í samfélaginu. Sú sýn ríkisstjórnarinnar að setja öll eggin í eina körfu er eitthvað sem okkur er kennt í barnaskóla að eigi ekki að gera. Atvinnulífið þarf að vera fjölbreytt og taka mið af hagsmunum komandi kynslóða.

 

Ég sit í bæjarstjórn Fjallabyggðar, í minnihluta, og hef tekið virkan þátt í sveitarstjórnarmálum í 14 ár. Vegna þeirrar reynslu veit ég að það þarf að efla sveitarstjórnarstigið í landinu með réttlátri tekjuskiptingu þannig að sveitarfélögin geti staðið við þær skuldbindingar sem þeim ber að gera. Ég vil sjá öflugt heilbrigðiskerfi fyrir alla landsmenn óháð efnahag en núverandi ríkisstjórn stefnir hraðbyri í fulla einkavæðingu með það eins og flest annað. Það þarf að fella ríkisstjórnina og ég vil gefa kost á mér til þeirra starfa með góðu fólki í Vinstri hreyfingunni - grænu framboði.

Ég fæddist í Reykjavík árið 1965, elst þriggja systkina, ólst upp á Siglufirði til 15 ára aldurs en flutti þá til Ólafsfjarðar og hef verið þar meira og minna síðan. Foreldar mínir eru Gunnar Ásgeirsson vélstjóri, Siglfirðingur sem rekur ætt sína að Stuðlum í Reyðarfirði og í Fljótin og Klara Björnsdóttir verkakona frá Akureyri. 

     Ég bý í Ólafsfirði, í nýsameinuðu sveitarfélagi sem heitir nú Fjallabyggð, með maka mínum Helga Jóhannssyni, þjónustustjóra Sparisjóðs Ólafsfjarðar. Börnin eru þrjú Tímon Davíð 24 ára, Klara Mist 19 ára og Jódís Jana 7 ára. Ég var við fjarnám við Verkmenntaskólann á Akureyri og lauk kennaraprófi frá Kennaraháskóla Íslands vorið 2005. Stunda nú meistaranám í náms- og starfsráðgjöf við Háskóla Íslands.

     Eins og gengur hef ég tekið mér ýmislegt fyrir hendur í atvinnu. Vann við bókhald í 16 ár, rak fyrirtæki sem framleiddi hljóðsnældur, er í dag kennari við Grunnskóla Ólafsfjarðar og rek í veitingastað í Ólafsfirði ásamt mágkonu minni.

Frestur til að tilkynna um þátttöku í forvalinu hefur verið framlengdur til 5. nóvember og nánari upplýsingar um hvernig það fer fram er á http://vg.is