Sigurverar kosninga

Kíkið líka endilega hér http://bvg.is/ þar sem vinur minn hugleiðir hvað kosningasigur er.

Netlögga??

Þetta er akkúrat hluti af því sem Steingrímur Joð var að tala um þegar hann talaði um netlöggu. Svona efni er nefnilega ekki fjarlægt af vefum ef ekki er um þá rætt af almenningi og kemur ekki til kasta lögreglunnar heldur ef enginn mótmælir slíkum viðbjóði.

Þetta er aðhald sem við sem við almennir netnotendur verðum að sýna og í framhaldinu fá málin væntanlega eðlilega meðferð í kerfinu.

Nauðgunarleikur fjarlægður af íslenskri vefsíðu

Ýmislegt skrafað í öllum bakherbergjum

Já það er ekki ofsögum sagt að nú er ýmislegt skrafað, skoðað og pælt hvernig þessi stjórn er og muni verða sérstaklega þeir sem gegna veigameiri embættum.

Á www.mannlif.is er þetta að finna

Meðal þess sem samið hefur verið um milli ríkisstjórnarflokkanna er að Samfylking fær forseta Alþingis um mitt kjörtímabil. Við þá breytingu fer af stað mikill kapall. Reiknað er með, án þess að það sé staðfest, að Jóhanna Sigurðardóttir velferðarráðherra fá embætti þingforseta en Katrín Júlíusdóttir verði ráðherra hennar í stað en gróflega var gengið framhjá Katrínu með skipan Þórunnar Sveinbjörnsdóttur í embætti umhverfisráðherra. Þá er reiknað með að Sturla Böðvarsson víki af þingi og verði hugsanlega vegamálastjóri. Áður en að þessu kemur mun Björn Bjarnason hætta ráðherradómi og frændi hans, Bjarni Benediktsson taka við. Það gæti orðið innan árs og er einn fjölmargra baksamninga sem gerðir hafa við myndum Þingvallastjórnarinnar ...

Mun betri skipting hjá Sollu

Jæja þá eru stólarnir á hreinu. Það má Ingibjörg eiga að hún passar uppá kynjajafnvægi enda á Samfylkingin nóg af frambærilegum konum sem og körlum.

Þórunn er sérfræðingur á sviði umhverfismála að sögn Ingibjargar og hún var lika á móti Kárahnjúkum svo við verðum að binda vonir við stóriðjustopp.

Hin ráðuneytin komu ekki á óvart, Möllerinn hefði ekki getað farið í neitt annað ráðuneyti en samgöngumálin og bindum við Fjallabyggðabúar í Norðausturkjördæmi miklar vonir við hann.

Jóhanna komin í gamalkunnugt ráðuneyti og rifjuð upp atvik í kringum það þegar hún sagði af sér og stofnaði Þjóðarflokkinn. Jóhanna ætlar að vera þægari núna en þá að hennar sögn enda var hún eina konan þá en nú eru þær fjórar. Hennar tími er sem sagt kominn.

Nú Össur er iðnaðarráðherra og ánægður með sig. Ferðamálin verða undir honum komin nú og er það víst það sem allir vilja byggja á nú um þessar mundir þannig að nú er lag - eða  hvað? Hann boðar í það minnsta sátt í málaflokkum sem undir hann heyra.

Björgvin sem viðskiptaráðherra - já sá hann alltaf fyrir mér sem menntamálaráðherra en það var víst ekki laust enda eina kona sjallanna í því embætti.

Nú er bara að bíða eftir stjórnarsáttmálanum í fyrramálið og hefjast svo handa í stjórnarandstöðunni við að rukka um efndir.

Þar standa Vinstri græn vaktina - það er nokkuð ljóst.

 

Þrjár konur og þrír karlar ráðherrar fyrir Samfylkingu

Ráðherrar SjálfstæðisMANNA

Það er ekki ofsögum sagt að þetta eru RÁÐHERRAR ein kona - svei attan. Enda ekki margar konur sem leiddu lista þeirra og því nokkuð ljóst að niðurstaðan yrði þessi.

Guðlaugur Þór - frændi minn - er nýr heilbrigðisráðherra og vona ég að undir hans stjórn verði ekki allt meira og minna einkavætt og enn dýrara í þjónustunni. Ég átti reyndar von á því að Ásta Möller yrði heilbrigðisráðherra og er hún að sjálfsögðu spæld - en ekki hvað. Hún sagði líka að hlutföllin hefðu átt að vera jafnari. En ekki er hefð fyrir því að mótmæla skoðun formannsins eins og hún sagði.

Svo mörg voru þau orð.

 

Guðlaugur Þór verður heilbrigðisráðherra

Góður dagur í dag

Átti góðan dag í dag. Byrjaði á því að gefa kirkjukórnum fiskisúpu í hádeginu og þegar ég kom heim kl. 14;30 þá var veður orðið svo gott að tíkurnar mínar skældu á göngu.

Plataði Bjössa og Þurý með mér þannig að ég fékk aðstoð við að halda í þær og fórum við alla leið inn að "svaði" á Skeggjabrekkudal. Voru eina tvo tíma og ég verulega þreytt enda 10 tíma vakt í gær í Höllinni og skrokkurinn svolítið að kvarta.

Kíkti svo til mömmu sem var nokkuð hress í dag og renndi henni svo í kvöldmatinn áður en ég fór heim. Þá tók við að hlýða Jódísi Jönu yfir fyrir íslenskuprófið sem er í fyrramálið. Matarundirbúningur - grillað þar sem veðrið var enn nokkuð gott.

Síðari hluti kvöldsins hefur farið fram í sjónvarpssófanum og ekki vanþörf á að slaka sér svolítið niður. Við hjónin bæði búin að vinna alla helgina þar sem minn kæri var í þakinu á Höllinni og steypuvinna framundan fyrir framan innganginn. Allt að gerast.

Hvert er hlutverk Ágústs Ólafs?

Það er von að maður spyrji sig hvert hlutverk Ágústs Ólafs sé þegar Össur er tekinn með í stjórnarmyndurnarviðræður. Það dugar mér ekki að segja að Össur sé gamall hundur í pólitík en Ágúst "nýliði". Hann er ferskur og örugglega með aðrar hugmyndir en þeir sem hvað lengst eru búnir að vera.

Ekki það að þetta undirstrikar akkúrat kosningabaráttuna, Ágúst Ólafur lítið sýnilegur en Össur áberandi.

Össur: Unnið að samræmingu þess helsta og besta úr stefnu flokkanna

Er eitthvað að marka það sem sagt er fyrir kosningar?

Var á bæjarstjórnarfundi á þriðjudaginn en þar kenndi ýmissa grasa. Upplýst var að Stefna ehf hefur tekið að sér að gera vefsíðu fyrir Fjallabyggð - þótt fyrr hefði verið, áætlað að hún verði klár í júní.

Nú auglýsa á eftir nýjum manni/konu í áhaldahúsið en þar hafa tveir látið af störfum vegna aldurs.

Umdeilt samkomulag vegna Aðalgötu 16 var samþykkt en spurningu minni um hvort lögfræðingur bæjarins hefði komið að málinu var ekki svarað.

Nú það sem mér fannst helst jákvætt við þennan fund var sú ákvörðun bæjarstjórnar að samþykkja að bjóða unglingum í vesturbænum uppá rútuferð í austurbæinn á sjómannadag. Sá dagur er mikill hátíðisdagur í Ólafsfirði og mikil almenn þátttaka bæjarbúa í skemmtidagskráinni og því við hæfi að reyna að fá hinn helming Fjallabyggðar til að vera með.

Töluvert var rætt um framhaldsskóla en þar fór Birkir Jón fremstur í flokki og byrjaði á því að biðja fólk að leggja til hliðar pólitískar væringar hvað þetta varðaði. Frá mínum bæjardyrum séð er ekki um pólitískan ágreining að ræða í þessu máli en hins vegar missti Birkir sig sem og sjálfstæðismenn hér í kjördæminu fyrir alþingiskosningarnar og blöðungar frá þeim bárust í hús degi fyrir kosningar þar sem það var fullyrt að framhaldsskóli opnaði hér í Ólafsfirði haustið 2009. Ég gat því ekki á mér setið eftir ræðu Birkis Jóns og sagði það sem ég tel því miður vera vont að slíkt skyldi hafa verið gert. Það þyrfti nefnilega stuðning Dalvíkurbyggðar til eins og við vissum en hvorki Birkir Jón né Sjálfstæðismenn nefndu það í blöðungnum sem þeir sendu inn. Ég veit fyrir víst að þetta ásamt því að pistill eða hvað við getum kallað það sem Þorgerður Katrín skrifaði á dag.net fyrir kosningar þar sem hún fullyrti slíkt hið saman fór ekki vel í Dalvíkingana. Það gleymdu nefnilega allir að minnast á að bæði sveitarfélögin þyrftu að koma sér saman annars rís ekki framhaldsskóli á svæðinu og þegar ég sé yfirlýsingu frá báðum sveitarfélögunum um staðsetningu hér í Ólafsfirði þá fyrst er ég örugg og tilbúin í framhaldsvinnuna sem slíkt krefst.

En líklega er ekkert að marka það sem Birkir Jón sagði fyrir þessar kosningar frekar en fyrir sveitarstjórnarkosningarnar en það voru hans orð eftir þær síðari að það væri svo margt sagt í kosingabaráttunni að það væri ekkert að marka.

Svo mörg voru þau orð.

Hitt stóra málið var hins vegar skipulag stjórnsýslu Fjallabyggðar. Það fannst mér illa undirbúið af hálfu meirihlutans og finnst kappið meira en forsjáin. Þetta er það stórt mál að vanda þarf til þess og ef ekki má kalla saman aukafund fyrir það þá veit ég ekki hvenær.

Ekki hef ég séð þarfagreiningu vegna þeirra starfa sem við eru að bætast en þar með er ég ekki að segja að þeirra sé ekki þörf vil bara sjá slíka greiningu sem og skilgreiningu á þeim störfum sem nú eru að breytast en hafa að hluta verið til. Engin starfslýsing er til á þeim einungis hvaða málaflokkar heyra undir viðkomandi. Meirihlutinn var ekki ákveðinn hver færi með mannaforráð og hver ekki og sá sem hafði með höndum að gera skipuritið hefur greinilega önnur sjónarmið en hluti meirihlutans eins og fram kom í "hringborðsumræðum" á bæjarstjórnarfundinum. En til þess var gripið vegna lélegs undirbúnings meirihlutans.

Heilmikið var rætt um skipulagsmál en á Siglufirði vill fjölskylda byggja sér sumarhús á svæði sem ekki er deiliskipulagt  (Jónstúnið - milli Hávegar og Hverfisgötu) inn í miðju grónu íbúðarhverfi. Íbúar eru ekki sátti - skil þá mjög vel og vilja að byggt verið á þeim lóðum sem lausar eru í þessu sama hverfi og um fullgilt íbúðarhús verði að ræða en ekki frístundahús til þess sé skipulögð frístundabyggð. Ég spurði formanninn hvort ég gæti óskað eftir að byggja á óskipulögðu svæði og fengið - miðað við áhuga á því að gera þetta. Það er ákveðin örvænting í því að rjúka til og deiliskipuleggja bara af því að einhver vill "loksins" byggja á Siglufirði.

Einnig eru deilur um deiliskipulag hesthúsahverfisins en þar vill formaður skipulags- og umhverfisnefndar hafa byggð báðu megin og taka þar með besta svæðið til að kenna t.d. krökkunum fyrir neðan veginn auk þess færa veginn til sem kostar mikla peninga.

Hugsa málin betur!!

Uppskeruhátíð

Fór á uppskeruhátíð Vinstri grænna á Akureyri á miðvikudagskvöldið. Þar var margt um manninn og rífandi stemming. Hér að ofan er mynd af þessum frábæru frambjóðendum í 1. - 4. sæti í Norðaustur þeim: Steingrími, Þuríði, Birni Val og Dýrleifu Skjóldal.

Flestir að skrafa um stjórnarmyndunarviðræðurnar sem þá voru uppi og sitt sýndist hverjum. Steingrímur og Þuríður fóru almennt yfir málin og sögðu sögur úr kosningabaráttunni. Nú á að fara að rífa húsnæðið okkar og byggja nýtt á þessu svæði. Við fáum þar inni en ekki er laust við að maður komi til með að sakna þess þótt hið nýja verði örugglega mjög skemmtilegt.

 Eitt af mörgu skemmtilegu hjá okkur í VG er sú staðreynd að þau sem skipa 2. og 3. sætið í Norðaustur, Þuríður og Björn eiga bæði maka sem einnig heita Þuríður og Björn.

Ég er ekki spennt að fara í stjórn með sjöllunum enda hefur mér ekki fundist það gefast vel minni flokkum hingað til. Ekki það að eins og staðan er í dag er Samfylkingin greinilega tilbúin að slá meira af kröfum sínum til að fá embætti heldur en Vinstri græn myndu gera að ég tel. Ekki það að ekkert er í hendi enn svosem en ég hef litla trú á að þetta takist ekki enda spáði ég þessu stjórnarmynstri fyrir kosningar.

Er fólk kjánar?

Get ekki annað en verið vonsvikin yfir því að ekki skyldi hafa tekist að fella ríkisstjórn ójöfnuðar og einkavæðingar. Spyr mig að því hvort fólk er almennt kjánar þegar kemur að kosningum þ.e. þeir sem ekki hafa makað krókinn í tíð ríkisstjórnarinnar og kjósa Sjálfstæðisflokk og Framsókn af gömlum vana þrátt fyrir að lepja dauðann úr skel og kvarta við eldhúsborðið.

Ég er þó afskaplega glöð með árangur míns flokks - Vinstri grænna - enda klárlega sigurvegarar þessara kosninga. Þingflokkurinn nánast tvöfaldaðist og ekki dæmi um slíkt áður.

Mikið verður skrafað um þessi mál næstu daga og vangaveltur allra verða örugglega túlkaðar á marga vegu eins og hverjum hentar.